DSE放榜生態奇觀　你總會遇見的6種人

DSE放榜日子又到，應屆考生努力了多年後今日終於公佈結果。DSE放榜這一天絕對是人生的轉捩點。筆者回想當年放榜當天，懷着緊張的心情踏進課室，拿取成績單後更見盡人生百態。當年身邊遇到的6種同學，相信同樣曾經出現在大家身邊：

1. 緊張大師上身的高材生

每班總有一兩位「星之子」被大家寄予厚望，甚至期望他們能在媒體內亮相，為校爭光。但他們往往亦是「緊張大師」，平日默書小測稍為失手，都會大哭一場。

來到放榜自然更加緊張，她一大清早就已「化行妝」到場等候，但一直坐立不安。終於等到老師呼喚名字，接過成績單後，她只看了一眼，就泣不成聲。

現場眾人面面相覷，大家都擺出一個「黑人問號」的模樣，心諗「唔通佢今舖失手，大熱倒灶？」

哭了良久，她抬起頭、眼有淚光來說：

我有一科竟然無5**，只得5*咋，今次點算？

對各科都只是勉強合格的旁人而言，我都未喊，但你就已經喊到豬頭，真係唔知同佢講咩好。

2. 準備海外升學的富二代

放榜為人生一大關口，有人緊張萬分，亦有人定過枱油。點解？人人一早9點就返到學校派成績表，但Mary久久未現身，班主任打電話給她，明顯仍在睡夢中的她說：「我瞓多陣再返嚟拎…」後來她回校接過成績單後，眼尾都無睄過，就將張成績表對摺放在她的包包裡。

有父幹，人生自然多其他人好多選擇。她早已決定前往英國升學，DSE？Who cares？

3. 識少少扮代表的「升學專家」

放榜不可怕，真正可怕的是身邊的「恐慌散播者」。

這種人有以下幾項特徵：他們早已Like定所有關於升學資訊的page，未放榜前已經日日share「放榜的N個小錦囊」等文章；放榜當天亦有備以來，袋內早已預備定N張身分證副本及證件相；銀包袋定成千蚊，預備隨時用作飛的士撲學校之用；甚至連撒瑪利亞防止自殺會、學友社等關於放榜後情緒輔導的小冊子都有。

當日他們又會周圍打探他人成績，並提供好似好有見地的建議，儼如升學輔導老師。

你俾左留位費未？幾百蚊都唔俾？啲位好搶手架！唔俾你隨時冇書讀！

真係有咁誇張得咁誇張，唔講總以為係離開地球前最後一班太空船的船飛。結果個個為求安心，都會乖乖打開銀包，先付留位費。

4. 一起隊Jolly Shandy 的最佳損友

放榜前一晚，總要約埋成班兄弟/姊妹，在海旁手執一枝Jolly Shandy吹水傾天光！

雖然各奔前程在即，但真正的友誼是拆不散的。大家為求減壓，一齊隊住Jolly Shandy一路高聲唱歌。

5. 未驚過的「廢青」

放榜咩嚟？食得㗎？他們無擔憂過，因為根本不在乎。考試期間照去玩，日日早出晚歸，視前途如無物。雖然好老定，但他們亦並非有強大「父幹」支持，只是一早疊埋心水，日後準備安心輪公屋，等政府養，再唔係就做倫敦金，深信最後咩成績都好，都一定死唔去。

6. 決心做職安真漢子

自知比上不足，比下有餘，勉強升學恐怕都只是晒錢晒時間。

既然入大學無望，不如另作打算，有人會選擇考警察、海關、成為職安真漢子等，一樣大把錢途，甚至過幾年後，收入總高過繼續升學的同班同學。

【延伸閱讀】DSE放榜攻略 5科22分仍有機會讀港大

【延伸閱讀】DSE文憑試放榜　報自資課程5點注意事項